God se Woord VARS vir jou Vandag

Send us Fan Mail
Efesiërs 1:18 Ek bid dat Hy julle geestesoë so verhelder dat julle kan weet watter hoop sy roeping inhou, en watter rykdom daar is in die heerlike erfenis wat Hy vir die gelowiges bestem het, 
Ons leef in ’n wêreld wat behep is met méér — meer geld, meer dinge, groter populariteit. En tog, ten spyte van al ons oorvloed, loop ons heeltyd rond met hierdie vrees vir ‘n tekort: Sê nou ek verloor alles? Sê nou ek het nie genoeg nie? So, hier is die vraag: Sê nou ware rykdom het niks te doen met wat jy besit nie — maar met dít wat jy reeds het? 
Stel jou voor iemand wen die lotto — miljoene rande — maar vergeet om sy kaartjie na te gaan. Vir jare leef hy van die hand na die tand, bekommer hom oor rekeninge en voel brandarm, terwyl ondenkbare rykdom net so onopgeëis in die boonste laai van sy bedkassie lê.
Volgens die apostel Paulus is dit presies hoe ons leef. Die meeste van ons leef heeltemal onbewus van die rykdom wat in Christus reeds ons s’n is — vrede wat te midde van chaos hou; vergifnis wat jou vrymaak; hoop wat langer as pyn hou, en die krag om heilig te lewe.
Ons jaag die wêreld se erkenning en trofees ná, terwyl die ware skat wag om ontdek te word in die verhouding wat ons reeds klaar met God het. Hier is Paulus weer:
Efesiërs 1:18: Ek bid dat Hy julle geestesoë so verhelder dat julle kan weet watter hoop sy roeping inhou, en watter rykdom daar is in die heerlike erfenis wat Hy vir die gelowiges bestem het,
Daardie seëninge is nie bankrekeninge of titels nie. Dit is genade, vergifnis, om êrens te behoort, en doelgerigtheid — skatte wat nooit vervaag nie. Miskien voel jy vandag misken, minderwaardig of onseker oor môre. Tog besit jy in Christus reeds al die rykdom van die hemel — liefde wat jy nooit kan verloor nie, hoop wat nie geskud kan word nie, en ’n lewe wat nooit opraak nie. 
So, hier is my gebed vir jou: Dat jy sal weet watter rykdom en heerlikheid daar in sy erfenis vir die gelowiges is. 
Dis God se Woord. VARS … vir jou … vandag.
Support the show
Enjoying The Content?
For the price of a cup of coffee each month, you can enable Christianityworks to reach 10,000+ people with a message about the love of Jesus!
DONATE R50 MONTHLY

Send us Fan Mail
Efesiërs1:18 Ek bid dat Hy julle geestesoë so verhelder dat julle kan weet watter hoop sy roeping inhou, en watter rykdom daar is in die heerlike erfenis wat Hy vir die gelowiges bestem het, 
Het jy al opgemerk hoe die dinge wat ons die vurigste najaag — sukses, erkenning, sekuriteit — selde daardie diep verlange en honger hier binne-in ons stilmaak? Ons dink meer geld, groter populariteit of meer beheer sal die lewe uiteindelik laat uitwerk. Maar hoe meer ons kry, hoe erger voel die leegheid. So, hier is die vraag: Sê nou die beste deel van die lewe is iets wat jy glad nie eers kan sien nie?
Jare gelede het ek ’n huis gekoop met goue krane in die hoofslaapkamer se badkamer. Elke keer as ek by daardie badkamer ingestap het, het ek ’n gevoel van selfvoldoening gekry. Dink net — ék het goue krane!
Maar dit het nie lank gevat voor daardie leë gevoel hier diep binne-in weer teruggekeer het nie. Daardie blink krane het naderhand kompleet gelyk of hulle net die diep leegheid in my siel weerspieël. Dit was die begin van my soeke na ’n ryk lewe wat verder strek as dit wat ek met die oog kon sien.
Die apostel Paulus het aan die gelowiges in Efese geskryf — mense wat omring was deur rykdom en afgodery — en hy het gebid dat hulle verby die sigbare dinge sou kyk: 
Efesiërs 1:18: Ek bid dat Hy julle geestesoë so verhelder dat julle kan weet watter hoop sy roeping inhou, en watter rykdom daar is in die heerlike erfenis wat Hy vir die gelowiges bestem het, 
Paulus het nie gebid vir hul sukses of dat hulle uit hulle omstandighede moes ontsnap nie, maar vir visie — geestelike insig; om hoop te sien wat verby rykdom of swaarkry strek.
Jy het dalk nie beheer oor wat rondom jou gebeur nie. Maar wanneer Jesus jou oë oopmaak, sal jy selfs in die donkerste uur die Lig, wat nooit doodgaan nie, sien, want sý hoop brand vir altyd. Sy hoop vervaag nooit.
Ek bid dat God jóú geestesoë so sal verhelder dat jy kan weet watter hoop sy roeping vir jou inhou.
Dis God se Woord. VARS … vir jou … vandag.
Support the show
Enjoying The Content?
For the price of a cup of coffee each month, you can enable Christianityworks to reach 10,000+ people with a message about the love of Jesus!
DONATE R50 MONTHLY

Send us Fan Mail
1 Petrus 2:9 Julle, daarenteen, is 'n uitverkore volk, 'n koninklike priesterdom, 'n nasie wat vir God afgesonder is, die eiendomsvolk van God, die volk wat die verlossingsdade moet verkondig van Hom wat julle uit die duisternis geroep het na sy wonderbare lig. 
Ons almal haat dit om verkeerd verstaan te word. Ons nekhare staan dadelik regop wanneer iemand spot met dít waarin ons glo. Dalk gebeur dit by die werk, aanlyn, of om die etenstafel — ’n snedige opmerking, ’n etiket wat om jou nek gehang word, of ’n grap wat diep sny. En iewers begin ons dink dít is vervolging. Maar is dit regtig? Wat gebeur wanneer dit jou baie meer as net jou trots of jou gewildheid kos om Jesus te volg? 
Vandag, dwarsdeur die wêreld, is vervolging baie meer as net slegsêery. Meer as 360 miljoen Christene leef onder ernstige onderdrukking — wat hulle verreweg die mees vervolgde groep op aarde maak. In dele van Asië, die Midde-Ooste en Afrika word gelowiges mishandel, in die tronk gestop of tereggestel vir hul geloof. Meer as 5 000 word elke jaar doodgemaak bloot omdat hulle weier om Jesus te verloën.
En tog is hierdie ding niks nuuts nie. Die apostel Petrus het aan die vroeë Christene geskryf wat presies dieselfde vrees in die gesig gestaar het: vervolging onder Rome; mense wat hul huise, hul inkomste en selfs hul lewens verloor het. Maar in plaas van wanhoop, het Petrus dít in ’n brief vir hulle geskryf:
1 Petrus 2:9: Julle, daarenteen, is 'n uitverkore volk, 'n koninklike priesterdom, 'n nasie wat vir God afgesonder is, die eiendomsvolk van God, die volk wat die verlossingsdade moet verkondig van Hom wat julle uit die duisternis geroep het na sy wonderbare lig.
Waar jy ook al vandag staan, of jy glo of nie, vervolging wys wat  regtig vir ons waardevol is. Vir volgelinge van Jesus is dit die roeping om die Lig van Jesus te weerkaats, nie om terug te deins nie. Om te leef met ’n goedheid wat so helder is, en met ’n barmhartigheid wat so eg is, dat selfs haat dit nie kan doodsmoor nie.
Want soos wat die wêreld donkerder word, raak God se Lig nie flouer nie. Deur sy kinders skyn daardie Lig dwarsdeur die nag.
Dis God se Woord. VARS … vir jou … vandag.
Support the show
Enjoying The Content?
For the price of a cup of coffee each month, you can enable Christianityworks to reach 10,000+ people with a message about the love of Jesus!
DONATE R50 MONTHLY

Send us Fan Mail
Romeine 13:1 Elke mens moet hom onderwerp aan die owerhede wat oor hom gestel is. Daar is immers geen gesag wat nie van God kom nie, en die owerhede wat daar is, is daar deur die beskikking van God. 
Jy skakel die nuus aan, en daar is dit al weer — nog ’n biljoen rand wat in een of ander spogprojek van die regering gepomp word, terwyl die armes honger ly, hospitale inmekaarstort en geregtigheid naderhand na ’n luuksheid begin voel. Dit laat ’n mens maklik wonder: Watter soort wysheid laat sulke mense regeer? God kon tog sekerlik beter gedoen het?
Nou die dag het ons gesels oor die betaling van belasting — oor hoe ons God moet eer selfs wanneer die stelsel onregverdig lyk. Maar hierdie ding loop dieper. Want as jy daaroor dink, is daar ‘n krag en mag agter elke wet, elke leier en elke nasie. En mag maak korrup, is dit nie so nie? So hoekom sal ’n goeie God sulke korrupte mense toelaat om in gesagsposisies te wees?
Op ’n skaakbord skuif die pionne en die ander stukke op maniere wat glad nie vir jou sin maak nie. Maar ’n skaakgrootmeester sien die hele wedstryd — elke skuif, elke doelwit en die uiteindelike skaakmat-skuif. Dis min of meer wat die apostel Paulus bedoel het toe hy dít geskryf het:
Romeine 13:1: Elke mens moet hom onderwerp aan die owerhede wat oor hom gestel is. Daar is immers geen gesag wat nie van God kom nie, en die owerhede wat daar is, is daar deur die beskikking van God. 
Dit beteken nie dat God elke liewe beleid goedkeur, of elke daad van magsmisbruik verskoon nie. Dit beteken dat sý magtigheid groter is as húlle mag. Selfs wanneer leiers onregverdig optree, is God steeds aan die werk — Hy vorm die geskiedenis, skaaf aan harte en roep sy mense op om met eerbaarheid te leef, nie met woede en ontsteltenis nie.
So, hoe reageer ons? Met wysheid, nederigheid en dapperheid. Ons praat die waarheid, ja. Ons bid vir ons leiers, absoluut. Maar bo alles weet ons dat die ware Koning nooit die beheer verloor nie — nie vir een enkele oomblik nie.
Want dit is God se Woord. VARS … vir jou … vandag.
Support the show
Enjoying The Content?
For the price of a cup of coffee each month, you can enable Christianityworks to reach 10,000+ people with a message about the love of Jesus!
DONATE R50 MONTHLY

Send us Fan Mail
Goeiemôre! Hier is die nuus uit die jaar 49 n.C.
Ons korrespondent in Galasië berig dat ’n brief van die apostel Paulus pas aan die gemeente voorgelees is. Daarin waarsku hy ernstig teen dwaalleraars wat die gemeente - in sy afwesigheid - weer onder die vloek van die wet wil inpraat. Dit klink kompleet of hierdie mense verblind is en nie meer helder kan dink nie! Paulus skilder in sy brief die reuse-kontras tussen hierdie twee maniere van dink. Mens wonder skoon oor hierdie beheptheid om die nuwe geloof in Christus te probeer kelder. (Galasiërs 3 en 4, veral 3:10-14).
Dit herinner sterk aan Adam en Eva en die vreeslike gevolge van húlle keuse. Hulle wou mos eerder self soos God wees en tussen goed en kwaad onderskei. Hulle wou self weet wat reg en verkeerd is, wat eintlik beteken het dat hulle God nie meer nodig sou hê nie. Onafhanklikheid!
Hoe som ’n mens reg en verkeerd in een woord op? Ja, die WET! Al het die Tien Gebooie eers baie later gekom, lê die wortel daarvan reeds in Genesis - soos ’n denkbeeldige lyn regdeur die boom van die kennis van goed en kwaad. Tot vandag toe sit die hele wêreld vasgevang in hierdie manier van dink. Mense dink die een kant van die boom is goed en die ander kant is sleg, en as hulle net hard genoeg probeer om "goed" te wees, sal hulle oukei wees. (Genesis 3)
Maar die waarheid is dat die gevolge van hierdie boom in die dood eindig. Die ware skeidslyn lê eintlik tussen die boom van die kennis van goed en kwaad aan die een kant, en die Boom van die Lewe aan die ander kant. Die Boom van die Lewe is Jesus self—gekruisig, gesterf en begrawe, maar opgestaan, opgevaar na die hemel en vandag aan die regterhand van die Vader. Dít is ’n lewende verhouding met Hom deur die Heilige Gees!
Kan ons hierdie voortdurende aanslag op die mens om onafhanklik en rebels te wees, koppel aan die vyand self? Dit lyk beslis so, want die profete Jesaja en Esegiël het sy rebellie teen God lankal reeds opgeteken. (Jesaja 14:12-15 en Esegiël 28:11-15).
Selfs die Ou Testament is vol name van manne wat in ’n intieme verhouding met God geleef het - dink maar aan Abraham, Moses, Joshua, Dawid en die profete. Ons korrespondent berig dat Paulus ook vir die Korintiërs hieroor geskryf het. Hy verduidelik dat mense verblind word sodra die wet aan hulle voorgehou word - amper soos ’n sluier oor hulle oë. Maar daardie sluier verdwyn die oomblik wanneer hulle deur die Heilige Gees na God toe draai. (2 Korintiërs 3:15-18).
Dit bring ons by die groot vraag: “Van watter boom leef ek en jy vandag?” Watter vraag regeer jou lewe? Is dit: “Wat is die regte of verkeerde ding om te doen?” Of is dit eerder: “Wat sal Lewe bring in my verhoudings, in my gesin, in my werkplek en in my hart?”
Terug by vandag:
Ons wil vreeslik graag jou kommentaar oor die daaglikse VARS-boodskappe hoor. Het die Here iets besonders in jou lewe gedoen? Vertel ons daarvan! Vertel ook vir ander en deel gerus die boodskappe met hulle—dis presies hoekom ons dit doen!
Laat weet ons ook sommer of die nuwe formaat van ons nuusbrief vir jou werk, of dalk irriteer. Ons wil regtig weet en ons het nie lang tone nie!
En soos jy weet, vertrou ons die Here elke maand om te voorsien sodat die begroting klop. Jy weet hoe dit werk!
Seën, vrede en opregte VARS-groete,
Jokkie, Annelie en die VARS-span
Support the show
Enjoying The Content?
For the price of a cup of coffee each month, you can enable Christianityworks to reach 10,000+ people with a message about the love of Jesus!
DONATE R50 MONTHLY