God se Woord VARS vir jou Vandag

Send us Fan Mail
Handelinge 5:29 Petrus en die ander apostels het geantwoord: “'n Mens moet eerder aan God gehoorsaam wees as aan mense! 
Almal sê hulle het beginsels - totdat daardie beginsels hulle iets begin kos. Dis die oomblik wanneer die aap uit die mou kom: Glo ek regtig wat ek sê ek glo, of ry ek maar net die golf solank dit veilig is?
Die fluitjieblaser, Katharine Gunner, was bekend daarvoor dat sy onveilige praktyke in Brittanje se National Health Service oopgevlek het. Sy was nie beroemd, magtig of beskerm nie. Sy het bloot verkeerde dinge gesien wat mense se lewens gekos het, en geweier om stil te bly — selfs toe dit beteken het dat sy haar werk kon verloor en in die publiek sleggesê word. Haar oortuiging was dít: “Jy kan nie regmaak wat jy nie bereid is om te konfronteer nie.” 
So, wat doen jy wanneer die druk erger word - wanneer stilbly die veiligste opsie is, maar om die waarheid te praat, jou duur te staan gaan kom? Dis presies waar jou oortuiging getoets en moed gebore word.
Ná Jesus uit die dood opgestaan het, is sy volgelinge in hegtenis geneem en gedreig omdat hulle oor Hom gepreek het - veral omdat hulle verklaar het dat Hy leef. Die owerhede het hulle beveel om op te hou, maar … 
Handelinge 5 vers 29: “Petrus en die ander apostels het geantwoord: ‘Ons moet eerder aan God gehoorsaam wees as aan mense.”
Dis presies hoe morele moed klink - ’n geloof wat weier om voor vrees te buig.
Om Jesus te volg en God te eer - kom selde sonder ’n prys. Dit beteken dalk om jou sê te sê by die werk, om op te staan vir iemand wat sleg behandel word, of om te weier om jou geloof af te water om te sê wat ander graag wil hoor.
Maar morele moed gaan nie oor wen nie - dit gaan oor aanbidding. Dit is om God bo alles te eer.
So, as gehoorsaamheid jou ooit iets kos - of dit nou jou gemak, mense se goedkeuring of ’n geleentheid is - onthou dít: die Een vir wie jy opstaan, het eerste vir jóú opgestaan. Hy het skande, verwerping en die dood deurgemaak omdat Hy lief is vir jou.
En wanneer jy kies om Hom te gehoorsaam, wat dit ook al kos, verloor jy nie - jy deel in sý oorwinning. Staan dus vas. Doen wat lewe bring. Dien God, nie mense nie. 
Dit is God se Woord. Vars … vir jou … vandag.
Support the show
Enjoying The Content?
For the price of a cup of coffee each month, you can enable Christianityworks to reach 10,000+ people with a message about the love of Jesus!
DONATE R50 MONTHLY

Send us Fan Mail
Josua 1:9 Ek self gee jou die opdrag. Wees sterk, wees vasberade. Moenie skrik nie, moenie bang wees nie, want Ek, die Here jou God, is by jou oral waar jy gaan.” 
Vrees kan ons lewens stilweg beheer, maar ware moed is om God te vertrou in plaas van om terug te deins. Dit skreeu nie altyd nie - soms fluister dit net: “Bly veilig, moenie uitstaan nie, moenie waag nie.” En voor ons ons oë uitvee, verdwyn ons moed en word gemak ons baas.
In 1953 het sir Edmund Hillary aan die voet van die berg Everest gestaan en besef dat hierdie tog elke klimmer voor hom hul lewens gekos het. Die vrees was werklik - maar sy vasberadenheid was sterker. Toe hy uiteindelik die kruin bereik het, het hy gesê: Dis nie die berg wat ons oorwin nie, maar onsself.
Dit is presies waar ’n man met die naam Josua homself bevind het. Sy mentor Moses - die grootste leier wat Israel nog geken het - was weg. Die taak wat voorgelê het, was vreesaanjaend: lei miljoene mense in ’n vreemde land, wat vol vyande is, in. Neem daardie land in, geveg ná geveg.
Interessant genoeg was God se eerste woorde aan hom nie oor taktieke of wapens nie, maar oor moed. 
Josua 1:9: Ek self gee jou die opdrag. Wees sterk, wees vasberade. Moenie skrik nie, moenie bang wees nie, want Ek, die Here jou God, is by jou oral waar jy gaan.
Dit is wat God vir Josua gesê het - en met my hele hart glo ek dat dít is wat Hy vandag vir jou sê. Ware moed is nie die afwesigheid van vrees nie. Dit is die stil besluit om God meer te vertrou as jou omstandighede; meer as jou gevoelens; meer as jou vrees.
So, watter berg ook al vandag voor jou staan – begin klim. Jy het nie volmaakte selfvertroue nodig nie, net die moed om te glo dat die Een wat jou roep, saam met jou sal stap, al die pad tot op die kruin. Ek self gee jou die opdrag. Wees sterk, wees vasberade. Moenie skrik nie, moenie bang wees nie, want Ek, die Here jou God, is by jou oral waar jy gaan. 
Dit is God se Woord. Vars … vir jou … vandag.
Support the show
Enjoying The Content?
For the price of a cup of coffee each month, you can enable Christianityworks to reach 10,000+ people with a message about the love of Jesus!
DONATE R50 MONTHLY

Send us Fan Mail
Job 13:15 Al sou God my doodmaak, ek kan nie wag nie ek moet my saak vir Hom stel.
Wat doen jy wanneer dít wat God doen nie vir jou sin maak nie? Wanneer jou gebede onbeantwoord bly, jou siekte vererger, en jou verlies ondraaglik voel? Jou verstand weet dat God goed is - maar jou hart fluister: Waarom gebeur dit dan?
Die 19de-eeuse Engelse prediker Charles Spurgeon het alles van persoonlike lyding geweet. Al was hy een van die kragtigste Evangeliste in die geskiedenis, het hy self geworstel met chroniese siekte, diep depressie en die onophoudelike kritiek van ander. Uit daardie pyn het een van sy bekendste uitsprake gekom: 
God is té goed om onvriendelik te wees, en Hy is té wys om ’n fout te maak. En wanneer ons nie sy hand kan sien nie, moet ons sy hart vertrou.
Dis een ding om dit te glo wanneer die lewe goed gaan, maar dis heeltemal iets anders wanneer die storm losbars. Daar is ’n verhaal in die Ou Testament oor ’n man met die naam Job. Hy was ’n goeie en godvresende man wat alles verloor het - sy rykdom, sy gesondheid selfs sy kinders. Ons het hom nou die dag ontmoet. Job kon geen rede sien waarom hierdie vreeslike dinge oor hom gekom het nie, tog sê hy te midde van wat die pynlikste en donkerste nag moes gewees het, in: 
Job 13 vers 15: “Al sou Hy my doodmaak, sal ek steeds op God vertrou.”
Só ’n geloof ontken nie die pyn nie — dit kyk daardeur. Dit sê: Ek verstaan nie wat U doen nie, Here, maar ek weet nog steeds wie U is.
En dít is die kern van vertroue. Wanneer jy nie sy hand in jou omstandighede kan raaksien nie, kan jy steeds sy hart vertrou - want daardie hart het eenmaal vir jou aan ’n kruis gehang. Daardie hart het eenmaal vir jou gesterf. Daardie hart het weer begin klop toe Jesus uit die dood opgewek is, om vir jou ’n nuwe lewe te gee, ’n ewige lewe.
En dit verander alles. 
Want dit is God se Woord. Vars… vir jou … vandag.
Support the show
Enjoying The Content?
For the price of a cup of coffee each month, you can enable Christianityworks to reach 10,000+ people with a message about the love of Jesus!
DONATE R50 MONTHLY

Send us Fan Mail
Matteus 5:10 “Geseënd is dié wat vervolg word ter wille van die geregtigheid, want aan hulle behoort die koninkryk van die hemel.” 
Verskoon my as ek nou ’n bietjie reguit is, maar hoeveel weet jy regtig van vervolging? Nie net as ’n woord nie — maar as iets wat mense elke dag aan hul eie bas voel. En as jy hoor dat Christene vandag op ’n ongekende skaal vir hul geloof ly, hoeveel saak maak dit regtig vir jou?
Op hierdie oomblik gaan Christene in Nigerië deur van die wêreld se mees brutale aanvalle. Volgens Open Doors in Brittanje, word daar elke jaar meer volgelinge van Jesus in Nigerië vermoor as in die hele res van die wêreld saam.
Premier Christian News in Londen berig dat daar in die afgelope jaar alleen meer as 7 000 Christene vermoor is. Meer as 1 100 gemeenskappe moes vlug, en byna 19 000 kerke is deur ekstremiste verwoes.
Maar daardie syfers verteenwoordig mense - gesinne wat vir hul lewens die bosse moes invlug, pastore wat gemartel is, vroue en kinders wat sonder ’n dak oor hulle kop sit. En dit alles net omdat hulle weier om Jesus te verloën. Jesus het in 
Matteus 5 vers 10: gesê: “Geseënd is dié wat vervolg word ter wille van die geregtigheid, want aan hulle behoort die koninkryk van die hemel.”
Dis nie ’n maklike vers om te hoor nie. Maar God vra dat ons saam met sy lydende liggaam sal staan - om te bid, om óm te gee, en om iets te doen. Want as een deel van die liggaam seergekry het, behoort elke ander deel mos die pyn te voel.
Dié van ons wat in relatiewe gemak en veiligheid leef, moet bid vir moed, hoop en krag vir ons broers en susters in Nigerië en dwarsoor die wêreld. En ons kan ook prakties help deur bedieninge te ondersteun, wat noodleniging bring en gelowiges help.  
En asseblief, moenie jou vryheid sommer net as vanselfsprekend aanvaar nie. Want die Evangelie waarvoor daardie mense sterf … is presies dieselfde Evangelie wat vir jou lewe gee.
Dit is God se Woord. Vars … vir jou … vandag.
Support the show
Enjoying The Content?
For the price of a cup of coffee each month, you can enable Christianityworks to reach 10,000+ people with a message about the love of Jesus!
DONATE R50 MONTHLY

Send us Fan Mail
Job 1:21 “Sonder iets het ek in die wêreld gekom en sonder iets gaan ek daaruit. Die Here het gegee en die Here het geneem. Prys die Naam van die Here.” 
Jy ken tog daardie tye in die lewe wanneer alles net goed gaan? Jou werk is veilig, die rekeninge is betaal, jou gesin is gelukkig, en die pad vorentoe lyk wonderlik. Alles voel sommer wonderlik. Maar dis dikwels juis dan wanneer 'n subtiele vyand stilletjies insluip.
Wanneer die lewe gemaklik is, is dit maklik om te begin glo dat ons die een was wat dit laat gebeur het: Dat ons ons sukses, ons gemak, en ons seëninge, op een of ander manier verdien. Maar in werklikheid kom elke goeie ding in jou lewe uiteindelik van God, en dieselfde God wat gee, neem partykeer ook weer weg.
Dit klink mos na die verhaal van Job in die Ou Testament. Job se lewe was onberispelik en hy was getrou aan God; hy was ryk; gerespekteer en omring deur familie. Hy het sewe seuns en drie dogters gehad. In daardie kultuur is groot gesinne en rykdom gesien as tekens van goddelike guns.
Toe, op 'n enkele dag, het rampe hom getref. Hy het sy vee, sy slawe, en selfs sy kinders verloor. En tog, in plaas daarvan om teen God te draai, het hy op die grond gaan lê en gebid, hy het  gesê:
Job 1:21 "Sonder iets het ek in die wêreld gekom en sonder iets gaan ek daaruit. Die Here het gegee en die Here het geneem. Prys die Naam van die Here."
Om te onthou dat alles wat ons het, 'n geskenk is, nie 'n waarborg nie - is werklik nederigheid!  So wees dankbaar wanneer dit goedgaan met jou lewe. Vier dit. Geniet dit. Maar wees versigtig vir trots. Trots begin saggies fluister: Jy verdien dit. Maar as jy dit met ‘n oop hand vashou, fluister nederigheid terug: Nee, dis genade.
Nederigheid is waar jy vrede sal vind, nie net wanneer jy ontvang nie, maar selfs wanneer dit weggeneem word. 
Die Here het gegee en die Here het geneem. Prys die Naam van die Here.
Dis God se Woord. Vars … vir jou … vandag. 
Support the show
Enjoying The Content?
For the price of a cup of coffee each month, you can enable Christianityworks to reach 10,000+ people with a message about the love of Jesus!
DONATE R50 MONTHLY