Wi snackt platt

Dütmal geiht dat bi "Wi snackt Platt" üm dat ne’e Stück in’t Ohnsorg-Theater. “Veer Lüüd in’n Neven” heet dat Stück, dat dor verleden Sünndag Premieer fiert hett – un wi, wi weern dorbi! Denn hebbt wi ok noch en lütten Utfloog-Tipp för Jo: wi kiekt uns den Lüchttorn "Dicke Berta" in Cuxhaven-Olenbrook an. Dorto gifft dat ok noch ne’e Musik op Platt vun Timsen vun’e Band Santiano un wi maakt Lust op uns Vertell doch mal-Afsluss Gala an’n 14. Juni, morgens Klock 11 in’t Ohnsorg-Theater.

Bi "Wi snackt" Platt maakt wi dütmal en lütte Pingsttour to de Windmöhl "Johanna" in Willemsborg. Se is een vun ganz vele Möhlen in Düütschland, de bi den "Düütschen Möhlendag" mit dorbi sünd un an'n Pingstmaandag jümehr Doren apen maakt. Wi hebbt uns de Möhl al vöraf mal ankeken un vertellt Jo, wat dat bi dat grote Möhlenfest, dat de Windmöhl "Johanna" an Pingstmaandag fiert, to beleven gifft. Denn geiht dat ok noch üm en ne'et interaktivet NDR-Hörspeel för Kinner un junge Lüüd, dat jüst rutkamen is. Wi weern dorbi as de Kinner, de dor as Spreker mit dorbi weern, sik dat eerste Mal "Dat Aventüer in de Ünnerwelt" anhöört hebbt. Bavento sünd wi ok noch mit den Kunsthistoriker Hans-Thomas Carstensen in'e Hamborger Kunsthall ünnerwegens - un wi hebbt blangen en poor plattdüütsche Snacks to Pingsten ok noch Tipps för plattdüütsche Pingstgottsdeensten för Jo: "Robinson Crusoe un sien Fründ Freedag" is dat Thema vun Paster Uwe Michelsen bi den Gottsdeenst an'n Pingstsünndag op de Flussschipperkark in'n Hamborger Haven. Namiddags, Klock 3 geiht dat los. Un an Pingstmaandagavend, dor laadt Daniel Kaiser un Jan Wulf hartlich to en Gottsdeenst in'e Krüüzkark in Wandsbeek in. Dat Thema: "La Paloma - As de Hillige Geist as Duuv daalkeem". Veel sungen warrt bi düssen Gottsdeenst, so ok "La Paloma" un "De Pingsttour" vun Hein Köllisch. Avends, Klock söss, geiht dat los.

(00:00:00) Intro
(01:12) Ik all alleen
(07:10) Kumm giff mi diene Hand
(14:14) Kortenspeel
(20:57) Deep in dien Hart
(25:52) La Paloma
(26:38) De Pingsttour
(32:39) Gliek

Dütmal sünd wi bi "Wi snackt Platt" in’t Filmmuseum in Bennstörp rp to Besöök, dorto geiht dat ok noch üm dat ne’e Album “Bongsiel” vun’e Band Aalkreik - un wi snackt mit den Hamborger Brandschuulbeopdragten Uli Weinert doröver, wat een doon kann, wenn dat tohuus mal brennen deit.

Moderatschoon: Jan Wulf

Dütmal sünd wi bi "Wi snackt Platt" in’t Rieck Huus in’e Verlannen to Besöök, dorto maakt wi ok noch en lütten Utfloog in’n Fröhlingswohld un stellt Jo den Förster Lennart Hatesohl vör - un dat geiht üm en ne’e plattdüütsche Rechtschrievpröven vun de SASS-Redakschoon, de Ji Jo op Joon Rekner installeern köönt.

Dütmal kiekt wi bi "Wi snackt Platt" op Finkwarder vörbi! Heel Finkwarder weer op de Been, üm tohoop to singen un de Dööp vun den Finkwarder Kutter HF 575 to fiern. Wi weern dorbi. Denn geiht dat ok noch üm dat ne’e Ohnsorg-Stück “Deutschstunde - Biller in’n Flammen” na den bekannten Roman “Deutschstunde” vun Siegfried Lenz - een Stück mit ganz veel Deepgang, dat to Harten geiht. Man dor is ok noch de anner Siet vun düsse Inszeneern: denn so veel Hoochdüütsch weer woll noch nich to beleven bi en normal Speeltiet-Stück op de grote Bühn vun't Ohnsorg. Bi "Wi snackt Platt" vertellt wi Jo mehr över dat Stück - un wi stellt mal wedder de Fraag: woveel Hoochdüütsch dörv ween in't plattdüütsche Theater. Dorto freit wi uns ok op Text- oder Spraaknarichten vun Jo: över uns NDR Hamborg-App, per Email an [email protected] oder via Telefon ünner 0800 903 903. Kössen deit de Anroop för Jo nix.